Publisher فوبيا الاسلام الخوف من الاسلام C9 Phi.

الإسلاموفوبيا (انجليزى: Islamophobia) هو لفظ او مصطلح بيتكون من كلمتين : اسلام و فوبيا. الفوبيا فى السايكولوجيا هى خوف مرضى بيسيطر على وجدان الانسان اللى بيعانى منه. لكن الإسلاموفوبيا ماهياش خوف مرض نفسى او شخصى لكن هى صوره نمطيه مسبقه عن الاسلام و المسلمين بتخلق كراهيه و عداء للاسلام و المسلمين و بتروجها فى المجتمعات الغربيه اجهزة الإعلام للإثاره او التوظيف السياسى و الحركات العنصريه المتطرفه و الاحزاب و المنظمات اليمينيه المتطرفه بهدف تخويف الناس من زيادة عدد المسلمين فى المجتمع و التاثيرات السلبيه اللى ممكن تحصل من كده ، و فى نفس الوقت بتبرر الحروب العسكريه اللى بيشنها الغرب على بلاد المسلمين. من ناحيه تانيه بيساهم الإسلامويين نفسهم فى تعضيد المخاوف عن طريق العمليات الإرهابيه فى مجتمعاتهم و بره مجتمعاتهم و عن طريق الترويع اللفظى و الترويج لافكار بتعتبر متخلفه و عنيفه و عدوانيه بالنسبه للمفاهيم الحديثه اللى بتقوم على التفاهم و التعايش. الصوره النمطيه المسبقه المستخدمه و اللى بيتروج ليها هى ان الاسلام مابيتعاملش مع المواضيع الحياتيه زى الثقافات التانيه ، و ان ثقافته دونيه و اقل من الثقافه الغربيه ، و انه ايديولوجيه سياسيه عنيفه اكتر من انه دين ، بطبيعة الحال تدخيل الاسلامويين الدين فى السياسه و لجؤهم للعنف الفعلى و اللفظى بيساهمو بشكل كبير و فعال فى تعضيد الصوره النمطيه المسبقه و بتستخدم كدليل على صحة رأى اللى بيعادو الاسلام ، و بالتالى بيعتبرو من الاسباب المباشره للإسلاموفوبيا